- 06 noyabr 17:54
- Məhkəmə
Müdafiə Nazirliyinin sabiq zabiti, "Şlyapa Zahid" ləqəbli Zahid Niftəliyevin 42 milyon manatlıq mənimsəmədə ittiham olunması ilə bağlı cinayət işi üzrə növbəti məhkəmə iclası baş tutub.
E-huquq.az-ın məlumatına görə, Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə Zahid Niftəliyev vəkilin suallarını cavablandırıb.
O bildirib ki, Müdafiə Nazirliyi üçün müəyyən işlərin görülməsi üçün onun adına pul götürülüb: "Bu işi Nəcməddin Sadıkov kimi vicdansız şəxslər görüblər"
Vəkil Zahid Niftəliyevdən onun tərəfindən götürüldüyü iddia olunan məbləğin 16 milyon manatını ayrı-ayrı xarici ölkə vətəndaşlarının adına köçürüb mənimsəməsi barədə soruşub.
Təqsirləndirilən şəxsin sözlərinə görə, kreditin təyinatından ancaq keçmiş vergilər naziri Fazil Məmmədov işdən çıxandan sonra xəbəri olub: "Fazil Məmmədov bizə kömək etmək istədiyini dedi. Mənim firmam vasitəsilə həmin işlər görülməli idi, orda kredit söhbəti olmayıb. Fazil öləndən sonra bank müdiri məni çağırıb dedi ki, adınızda kredit var".
Vəkil "Sizin ümumiyyətlə bankdan 7 dəfə kredit götürdüyünüz məlum olur, axırıncı dəfə də 22 milyon manat. Bununla bağlı bankların 7 müqaviləsi var. Nə deyə bilərsiniz?" deyə soruşub.
Təqsirləndirilən şəxs diqqətə çatdırıb ki, o, bankda bir dəfə olub və bir müqavilə imzalayıb, lakin digər müqavilələr uydurmadır.
Vəkil "30.06.2015-ci ildə "Ata Bank"dan 24 milyon manat sizin şirkətin hesabına köçürüləndən sonra Zahid Niftəliyev elə həmin gün "SVİFT KONSALTİNQ LİMİTED" şirkətinə 16 milyon 847 min 800 manat pul köçürmürsüz. Şirkət kimin olub? Onunla müqavilənin olubmu? Bu barədə nə deyə bilərsiniz?" deyə soruşub.
Təqsirləndirilən şəxs bildirib: “Mən bircə onu bilmişəm ki, avadanlıqlar bu şirkətin vasitəsilə gətiriləcək"
Vəkil təqsirləndirilən şəxsdən kredit götürərkən sənədlərə baxıb-baxmadığını soruşub.
"Krediti özümə götürmədiyimə görə oxumamışam, sadəcə vətənpərvərlik etmişəm. Mənə dedilər ki, Fazil Məmmədov humanitar yardım kimi iş görür, Azərbaycan Ordusuna kömək edir. Rəfiyev də mənə dedi ki, bu işlər qurtarandan sonra həmin firma da bağlanacaq, sənlik heç nə olmayacaq. Mən kiməm ki, kredit qanunsuz olduğu halda o məbləğdə mənə kredit versinlər", - deyə Z.Niftəliyev bildirib.
Növbəti məhkəmə prosesi 27 noyabr tarixinə təyin olunub.
Xatırladaq ki, hazırda DTX-də istintaqı yekunlaşdırılmış iş üzrə hərbçilər arasında "Şlyapa Zahid" ləqəbi ilə tanınan Zahid Niftəliyev öz adına formal şirkət açaraq "Ata Bank" ASC-dən köçürülmüş 42 milyon manat kreditə dair məhkəmə qərarını qərəzli olaraq icra etməməkdə təqsirləndirilir.
İttihama əsasən, Zahid Niftəliyev məqsədyönlü şəkildə həmin məbləğdə kredit almaq məqsədilə “Şahin-CO” adlı şirkət yaradıb, şirkət təsərrüfat və maliyyə vəziyyəti barədə "Ata Bank" ASC-yə saxta məlumatlar təqdim etməklə 2016-cı ildə 12 ay müddətinə 42 milyon 470 min 885 manat manat kredit alaraq xüsusilə külli miqdarda ziyan vurub. O, götürülmüş kreditin ləğv prosesində olan "Ata Bank" ASC-yə ödənilməsi ilə bağlı məhkəmə qətnamələrini qərəzli olaraq icra etməyib.
Qeyd edək ki, Zahid Niftəliyev Azərbaycan Ordusunun keçmiş Baş Qərargah rəisi Nəcməddin Sadıkovun yaxın adamı olub.
Orxan Rasifoğlu