Müsahibə mərhələsinə buraxılmış hakimliyə namizədlərin siyahısı açıqlandı

Məhkəmə fəaliyyətinin təkmilləşdirilməsi üzrə görülən tədbirlər çərçivəsində Hakimlərin Seçki Komitəsi tərəfindən yeni nəsil hakim korpusunun çevik komplektləşdirilməsi məqsədilə hakim vəzifəsinə namizədlərin seçim prosesi fasiləsiz davam etdirilir.

Hakimlərin Seçki Komitəsindən e-huquq.az-a verilən məlumata görə, davamlı olaraq aparılan müsabiqə çərçivəsində növbəti test imtahanında müvəffəqiyyət qazanmış hakimliyə namizədlərlə 2025-ci il 9 fevral tarixdə Dövlət İmtahan Mərkəzinin elektron imtahanlar korpusunda elektron qaydada yazılı imtahan keçirilib, imtahan zamanı cinayət və mülki sahələr üzrə kazus xarakterli 2 sual 4 saat ərzində cavablandırılıb.

Hakimliyə namizədlərin cavab vərəqələri kodlaşdırılaraq anonim qaydada, ikiqat üsulla Hakimlərin Seçki Komitəsinin üzvləri və dəvət edilmiş mütəxəssislər tərəfindən ayrı-ayrılıqda yoxlanılıb. Qaydalara əsasən, namizədin həm cinayət, həm də mülki sahələr üzrə topladığı ballar cəmlənib və 2-yə bölünərək, yekun bal müəyyən olunub.

İmtahanın nəticəsinə görə 60 və daha çox bal toplamış 61 nəfər hakimliyə namizəd müsahibə mərhələsinə buraxılıb. Müvafiq mərhələ 2025-ci il 5 may tarixdən başlayaraq növbəli qaydada keçiriləcəkdir.

Xatırladaq ki, hakimliyə namizədlərin sənədlərinin qəbulu davam edir və növbəti test imtahanı cari ilin sentyabr ayının 21-də keçiriləcək. Hakimlərin Seçki Komitəsi hakim olmaq arzusunda olan şəxsləri müsabiqədə daha fəal iştiraka dəvət edir.

Müsahibə mərhələsinə buraxılmış hakimliyə namizədlərin şəxsi eyniləşdirmə kodu üzrə siyahısı: