Vəkillər Kollegiyasının nümayəndə heyəti İtaliyada beynəlxalq konfransda iştirak edib - FOTO

20-23 mart tarixlərində İtaliyanın paytaxtı Roma şəhərində Avropa Gənc Vəkillər Assosiasiyasının (EYBA) təşkilatçılığı və İtaliya Gənc Vəkillər Assosiasiyasının dəstəyi ilə növbəti geniş miqyaslı beynəlxalq yaz konfransı keçirilib. Tədbirdə ABŞ, Asiya və Avropanın bir çox ölkələrinin vəkil və hüquqşünasları iştirak edib.

Bu barədə e-huquq.az-a Vəkillər Kollegiyasından məlumat verilib.

Azərbaycan Respublikasının Vəkillər Kollegiyasının (ARVK) EYBA-da səlahiyyətli nümayəndəsi Yunis Nəsibov və ARVK-nın üzvü Nurəngiz Qarayeva sözügedən konfransa qatılıb.

Tədbirdə müasir hüquq problemləri, vəkillər və hüquqşünaslar üçün etika və intizam kodeksi ilə bağlı problemlər, əmək hüququ və ekoloji tətil, şirkətlərin birləşməsi və satınalma hüququnda yeni trendlər, hüquq sahəsində süni intellektin rolu və gələcək perspektivləri mövzusunda müzakirələr aparılıb və çıxışlar edilib.

EYBA-nın prezidenti Şanon Qavli (Shannon Gawley) açılış nitqi ilə çıxış edib, Assosiasiyanın təşəbbüsü ilə görülən işlər, davam edən layihələr, gələcək planlar barədə məlumat verib.

Eyni zamanda konfransda gənc vəkillərin iş prosesində üzləşdiyi bir sıra problemlər səsləndirilib.

Sonra Lissabon Hüquq məktəbinin professoru və İnsan Hüquqları üzrə Avropa Məhkəməsinin keçmiş hakimi Paulo Pinto de Albuquerque, Roma Vəkillər Kollegiyasının prezidenti Paolo Nesta, Beynəlxalq Vəkillər Assosiasiyasının prezidenti Claudio Visco, Milan Vəkillər Kollegiyasının prezidenti Antonino La Lumia, Münhen Vəkillər Kollegiyasının prezidenti Anne Riethmüller, eləcə də digər vəkil və təmsilçilər tərəfindən maarifləndirici nitqlər səsləndirilib.

Tədbirin ikinci günü EYBA-nın Ümumi Yığıncağı baş tutub. Yığıncaqda hazırda davam edən layihələr, gələcək planlar və qurumun idarəçiliyi ilə bağlı digər məsələlər müzakirə edilib.

Həmçinin konfrans çərçivəsində Yunis Nəsibovun da üzv olduğu EYBA Audit Komitəsinin görüşü keçirilib.

Bundan başqa, tədbir iştirakçıları üçün İtaliya Ali Məhkəməsinin inzibati binasına və İtaliya Konstitusiya Məhkəməsinin inzibati binasına ekskursiya təşkil edilib.

Konfrans müddətində vəkillər arasında sosial əlaqələrin qurulması istiqamətində, xüsusilə Münhen və Roma gənc vəkilləri arasında əlaqələrin genişləndirilməsi istiqamətində müzakirələr aparılıb, o cümlədən fərqli iş yeməkləri, sosial fəaliyyətlər həyata keçirilib.

Sonda iştirakçılara rəsmi ziyafət təşkil olunub.