"Toplum TV" işi üzrə təqsirləndirilənlərin məhkəməsi başladı

"Toplum TV" işi üzrə təqsirləndirilənlərin məhkəmə prosesi başlayıb.

E-huquq.az xəbər verir ki, Bakı Ağır Cinayətlər Məhkəməsində hakim Azər Tağıyevin sədrliyi ilə keçirilən bugünkü prosesdə təqsirləndirilən şəxslərin anket məlumatları dəqiqləşdirilib.

Daha sonra iş üzrə təqsirləndirilən şəxslərin bir neçəsi ev dustaqlığına buraxılması ilə bağlı vəsatət verib.

Məhkəmə vəsatəti təmin etməyib.

İşə yeni qoşulan Akif Qurbanovun vəkili Fuad Ağayevin cinayət işi ilə tanış olması ilə əlaqədar məhkəmənin növbəti iclası 24 aprel tarixinə təyin edilib.

Xatırladaq ki, Daxili İşlər Nazirliyinin mətbuat xidmətinin yaydığı məlumata görə, paytaxtın Nərimanov rayonu Y.V.Çəmənzəminli ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları əməliyyat-axtarış tədbirləri keçiriblər.

İstintaq araşdırması zamanı "Toplum TV"nin təsisçisi Ələsgər Məmmədli, redaktor Müşfiq Cabbarov, “Demokratik Təşəbbüslər İnstitutu”nun rəhbəri Akif Qurbanov, Demokratik Təşəbbüslər İnstitutunun əməkdaşı Əli Zeynalov, "III Respublika" Platformasının qurucu heyət üzvü Ruslan İzzətli, Ramil Babayev, İlkin Əmrahov, Şahnaz Bəylərqızı məsuliyyətə cəlb olunublar.

Təsisçi Ələsgər Məmmədli də daxil olmaqla, təqsirləndirilən şəxslərin hamısına Cinayət Məcəlləsinin 206.4-cü (qaçaqmalçılıq – mütəşəkkil dəstə tərəfindən törədildikdə), 192.3.2-ci (qanunsuz sahibkarlıq – mütəşəkkil dəstə tərəfindən törədildikdə), 193-1.3.1-ci, 193-1.3.2-ci (cinayət yolu ilə əldə edilmiş xeyli miqdarda pul vəsaitlərini leqallaşdırma – mütəşəkkil dəstə halında törədildikdə), 213.2.1-ci (vergidən yayınma - mütəşəkkil dəstə tərəfindən törədildikdə) və 162-1-ci (əmək müqaviləsi olmadan işçilərin hər hansı işə cəlb edilməsi) maddələri ilə yekun ittiham verilib.

Humay Eminqızı