Bayram günü kafedə 2 nəfəri öldürməkdə təqsirləndirilən şəxsin məhkəməsi: "Arif anasının kababçı ilə sevgili olmasını bilib"

Bakıda kafedə 2 nəfəri qətlə yetirməkdə təqsirləndirilən Arif Bəhərçiyevin cinayət işi üzrə məhkəmə prosesi davam etdirilib.

E-huquq.az-ın məlumatına görə, Bakı Ağır Cinayətlər Məhkəməsinin hakimi Əli Məmmədovun sədrliyi ilə keçirilən prosesdə zərərçəkmiş şəxsin hüquqi varisi Dilarə Tağıyeva təqsirləndirilən şəxsə qarşı 80 min manat mülki iddia qaldırıb.

Məhkəmə qısa müşavirədən sonra zərərçəkmiş şəxsin mülki iddiasını təmin edib.

Lakin təqsirləndirilən mülki iddiaya münasibət bildirərək, iddianı qəbul etməyib, eyni zamanda ödəmək imkanında olmadığını bildirib.

Daha sonra şahid qismində Kifayət Əfəndiyeva dindirilib: "31 dekabr günü axşam saat 10 olardı. Mən orda qabyuyan işləmişəm. Hadisəni gözümlə görməmişəm. Sonra qışqırıq səsi gəldi. Sonradan eşitdim ki, təqsirləndirilən şəxs anasına əl qaldırıb. Daha sonra polislər gəldi. Mən 3 ay idi ki, orda işləyirdim. Yoldaşım isə orada ofisiant işləyirdi. Namiqi işlədiyim müddətdə görmüşəm və kollektivlə münasibəti yaxşı idi. Ramini uzanıqlı vəziyyətdə yerdə gördüm".

Şahid Mübariz Əfəndiyev isə bildirib ki, hadisə zamanı qətlə yetirilən Namiq Orucovla yaxın qohum olublar: "Mən orda kababçı olaraq işləyirdim. Bayram günü axşam saat 22-də yığıncaq var idi və sifarişlər çox idi. Bizə deyildi ki, gəlin yeməyinizi yeyin, sonra sifarişlər çox olacaq. Birdən təqsirləndirilən şəxsin anası Gülnür qışqırıb "Arif məni təpiklə vurur" dedi. Şişə çəkilən kabablar yerə tökülüb. Namiqdən soruşdum ki, Arif anasını niyə vurub? Sonradan qarışıqlıq düşdü. Arif də və onun atası İlfan da içkili idi. Atası anası ilə niyə dalaşdığını soruşanda anası söhbətə müdaxilə etdi. Bu məqamda Arif anasına möhkəm şillə vurdu. Sonradan məlum oldu ki, Arif anasının kababçımız Namiqlə sevgili olmasını bilib. Sonra gördüm ki, Arif bıçaq götürüb çölə çıxdı. 2 dəqiqə keçmədi, çöldə qışqırıq səsi gəldi və gördük ki, Arif kababçı Namiqi və onları aralamaq istəyən müştəri Ramini də bıçaqla vurub".

Məhkəmənin növbəti iclası oktyabrın 21-nə təyin edilib.

Qeyd edək ki, hadisə ötən ilin dekabrın 31-də paytaxtın Binəqədi rayonu, Biləcəri qəsəbəsi ərazisində yerləşən kafedə baş verib. Belə ki, 2001-ci il təvəllüdlü Arif Bəhərçiyev iaşə obyektlərindən birində aralarında yaranmış mübahisə zamanı 1968-ci il təvəllüdlü Namiq Orucov və 1981-ci il təvəllüdlü Ramil Səfərovu öldürməkdə təqsirləndirilir. Ona qarşı Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə), 120.2.3 (zərəçəkmiş şəxsi ictimai borcunu yerinə yetirməsi ilə əlaqədar qəsdən öldürmə), 120.2.7-ci (iki və ya daha çox şəxsi öldürmə) və 221.3-cü (silah qismində istifadə olunan əşyalardan istifadə etməklə xuliqanlıq) maddəsi ilə ittiham irəli sürülüb.

Orxan Rasifoğlu