Həddindən artıq duz istehlakı piylənmə riskini artıra bilər

Həddindən artıq duz istehlakı piylənmə riskini 330 faizdən çox artıra bilər.

E-huquq.az xarici mətbuata istinadən xəbər verir ki, bu barədə Avropa Piylənmə Araşdırmaları Assosiasiyasının apardığı araşdırmada bildirilir.

Tədqiqat Finlandiya Sağlamlıq və Rifah İnstitutundan Annika Santalahti və onun komandası tərəfindən aparılıb.

Ümumdünya Səhiyyə Təşkilatına (ÜST) görə, piylənmə bədən kütləsi indeksinin (BKİ) 30 kq/m² və yuxarı olması kimi müəyyən edilir.

Abdominal piylənmə daxili orqanlar ətrafında artıq yağ yığılması ilə ölçülür və daha çox ürək-damar xəstəlikləri riski daşıyır.

Mütəxəssislər vurğulayırlar ki, yüksək natrium qəbulu təkcə qeyri-sağlam qidalardan deyil, həm də işlənmiş ət məhsulları, çörək və pendir kimi gündəlik qidalardan qaynaqlanır. Tədqiqat qrupu fərdi tədbirlərin kifayət etmədiyini və cəmiyyət səviyyəsində dəyişikliklərin yalnız qida sektoru ilə əməkdaşlıqda mümkün olduğunu bildirir.

2017-ci il milli "FinHealth" araşdırmasının məlumatlarına görə, qadınlarda gündəlik duz istehlakı ÜST-nin tövsiyə etdiyi gündəlik 5 qramlıq limitdən demək olar ki, iki dəfə, kişilərdə isə üç dəfə çox idi.

Kişilərdə ən yüksək natrium qrupunda olan fərdlərdə ümumi piylənmə riskinin 6 dəfə, qarın piylənmə riskinin isə 4,7 dəfə yüksək olduğu müəyyən edilib.

Mütəxəssislərin fikrincə, yüksək duz istehlakı toxluq hormonlarına təsir edə bilər və bağırsaq mikrobiomunda və bədən tərkibində bioloji dəyişikliklərə səbəb ola bilər.

Qeyd edək ki, yüksək natrium qəbulu çox vaxt həddindən artıq işlənmiş qidaların istehlakını əks etdirir.

Tədqiqat qrupu bu əlaqənin bioloji mexanizmlərinin daha da araşdırılması lazım olduğunu vurğulayaraq, eyni zamanda qida sənayesinin natrium səviyyəsinin azaldılmasında əsas rol oynaya biləcəyini ifadə edir.

Humay Eminqızı