Ağırlıq qaldırmaq beyin yaşlanmasının qarşısını alır

Ağırlıq qaldırma ilə məşğul olmağın yaddaş qabiliyyətini artıraraq Alzheimer riskini azaltdığı məlum olub.

E-huquq.az xarici mətbuata istinadən xəbər verir ki, San-Pauludakı Campinas Universitetinin alimləri tərəfindən aparılan araşdırmada yüngül koqnitiv pozğunluğu olan 44 nəfər müayinə olunub.

Altı ay ərzində həftədə iki dəfə ağırlıq qaldıran iştirakçıların yaddaşında və beyin strukturlarında əhəmiyyətli irəliləyiş qeydə alınıb. Məşq etməyən qrupda isə koqnitiv geriləmə aşkar edilib.

Tədqiqat, çəki məşqlərinin Alzheimer xəstəliyi ilə əlaqəli hipokampus və prekuneus bölgələrində büzülmənin qarşısını aldığını ortaya qoyub.

Tədqiqatın aparıcı müəllifi Isadora Ribeiro bildirib ki, ağırlıq qaldırmaq demensiyaya qarşı güclü qoruma təmin edir. Onun sözlərinə görə, daha uzun müddətli məşq proqramları demensiyanın inkişafını gecikdirə və ya tamamilə qarşısını ala bilər. Lakin alimlər uzunmüddətli çəki məşqlərinin demensiyaya təsiri ilə bağlı əlavə araşdırmalara ehtiyac olduğunu bildirib.

Şəbnəm Mehdizadə