İşçilərin suyuna zəhər qatan anbardar saxlanıldı

Braziliyada həmkarlarını natrium hidroksidlə zəhərləməkdə şübhəli bilinən anbardar saxlanılıb.

E-huquq.az xarici mətbuata istinadən xəbər verir ki, hadisə mart ayının sonunda Rio Qrande-du-Sul əyalətinin Kanoas şəhərində baş verib.

Belə ki, soyuducudan su içən iki işçinin səhhətində ciddi dərəcədə problemlər yaranıb. Hadisənin araşdırılmağı üçün anbar rəhbərliyi tərəfindən müstəntiqlər çağırılıb.

Müşahidə kameralarını yoxladıqdan sonra məlum olub ki, 31 yaşlı işçi soyuducuya nəsə töküb. Ekspertiza müəyyən edib ki, suyun tərkibində ciddi kimyəvi yanıqlara səbəb olan son dərəcə zəhərli qələvi olan natrium hidroksid var. Bu maddənin sulu məhlulu alüminiumu məhv edir.

Təqsirləndirilən şəxs martın 27-də həbs edilib.

Qeyd edək ki, əgər anbardarın iş yoldaşlarını zəhərlədiyi təsdiqini tapsa, onu 10 ildən 15 ilədək həbs cəzası gözləyir.

Humay Eminqızı