Almaniya kansleri: “Tramp ticarət düzəninə hücum edir”

Almaniya kansleri Olaf Şolz ABŞ prezidenti Donald Trampı qlobal ticarət nizamına zərbə vurmaqda günahlandırıb və Trampın tariflərlə bağlı qərarının kökündən yanlış olduğunu, qlobal iqtisadiyyatın bundan zərər görəcəyini bildirib.

E-huqu.az xarici KİV-ə istinadən xəbər verir ki, bu barədə Şolz Almaniyaya səfər edən İordaniya kralı II Abdullah ilə görüşündən sonra mətbuat konfransında ABŞ prezidenti Donald Trampın imzaladığı fərman çərçivəsində ölkənin 185 ticarət tərəfdaşına tarif tətbiqini dəyərləndirərkən bildirib.

Trampı ticarət düzəninə hücum etməkdə günahlandıran Şolts, "Bu, bütün dünyada rifah yaradan və əslində Amerikanın səylərinin nəticəsi olan ticarət nizamına hücumdur. Nəticədə bütün qlobal iqtisadiyyat zərər görəcək",- deyə bildirib.

Şolts, Avropanın azad ticarəti müdafiə etməyə davam edəcəyini və qarşıdurmaya deyil, əməkdaşlığa bağlı olduğunu qeyd edib.

Qeyd edək ki, ABŞ prezidenti Donald Tramp dünən ABŞ-a idxal edilən bütün məhsullara gömrük rüsumlarının tətbiq edilməsi haqqında fərman imzalayıb. Trampın imzaladığı fərman çərçivəsində ABŞ-ın bir çox ticarət tərəfdaşlarına tariflərin tətbiqi nəzərdə tutulur. Tarif dərəcələri 10-50 faiz arasında dəyişir.

Qlobal iqtisadi yavaşlamaya səbəb ola biləcək bu vəziyyət genişmiqyaslı ticarət müharibəsinin başlaya biləcəyi ilə bağlı narahatlıqları artırıb. Avropa İttifaqı da daxil olmaqla bir çox ticarət tərəfdaşları artıq əks tədbirlər elan ediblər.

Humay Eminqızı