Avstraliyalı tədqiqatçılar Antarktika qitəsindən yeni növ dəniz canlıları toplayıblar

Avstraliyalı alimlər Antarktika qitəsinin şərqində apardıqları araşdırmalar zamanı elm aləmində yeni ola biləcək dəniz canlısı növlərinə aid nümunələr topladıqlarını bildiriblər.

E-huquq.az xarici mətbuata istinadən xəbər verir ki, RSV Nuyina buzqıran gəmisi ilə Antarktika qitəsinin şərqinə 60 günlük səyahətə çıxan tədqiqatçılar, aralarında Avstraliya Antarktika Proqramı (APP) da daxil olmaqla 4 elmi qurumla əməkdaşlıq edərək dəniz elminə yönəlmiş missiyanın bir hissəsini tamamlayıblar.

Şərqi Antarktidadakı Denman buzlağına isti suların təsirini araşdıran tədqiqatçılar Cənubi Okeandan topladıqları yeni biomüxtəliflik nümunələrini də təhlil ediblər.

Tədqiqatçılar nümunələr arasında dəniz xiyarının bir növü olan "dəniz donuzu", dəniz dibində yaşayan kiçik xərçəngkimilər olan izopodların və suda üzərkən qanadlarını çırpan kimi görünən "dəniz kəpənəyi" adlı dəniz ilbizinin olduğunu qeyd ediblər. Onlar eyni zamanda yemək boşqabının ölçüsünə çatan dəniz ulduzları və bölgəyə endemik olan müxtəlif osminoq növləri də daxil olmaqla bənzəri olmayan canlı növləri ilə də rastlaşıblar.

Tədqiqatçılar topladıqları dəniz kəpənəyi gəmidəki akvariumlardan birində yumurta qoyarkən ilk dəfə olaraq "pteropod" yumurtalarının inkişafını sənədləşdirmək fürsəti əldə ediblər.

Təxminən 4 min kilometrlik bu səyahət zamanı ən sürətli əriyən buzlaqlardan biri olan Denman Buzlağından götürülmüş nümunələri araşdırdıqlarını, müxtəlif dərinliklərdə suyun istiliyi, duzluluğu və oksigen səviyyələrini təhlil etdiklərini bildirən araşdırma qrupundan Dr. Laura Herraiz Borreguero, buz kütləsinin son iyirmi ildə 5 kilometr geri çəkildiyini təyin etdiklərini bildirib.

Qeyd edək ki, fevral ayında yola çıxan tədqiqat qrupunun mayın əvvəlində Avstraliyanın Hobart şəhərinə qayıtması planlaşdırılır.

Humay Eminqızı