Dünyanın ən kiçik kardiostimulyatoru hazırlanıb

ABŞ alimləri dünyanın ən kiçik kardiostimulyatorunu hazırlayıblar.

E-huquq.az xarici mətbuata istinadən xəbər verir ki, alimlər bu kardiostimulyatorun bir neçə il sonra insanlar üzərində sınaqdan keçirilə biləcəyini bildiriblər.

Yeni hazırlanan cihazın xüsusilə anadangəlmə ürək qüsuru ilə doğulan və əməliyyatdan sonra müvəqqəti kardiostimulyatora ehtiyacı olan körpələr üçün əhəmiyyətli bir həll təklif etməsi gözlənilir.

Bu stimulyatorun yetkin xəstələrdə ürək əməliyyatından sonra normal ritmlərinə qayıtmalarına kömək etmək üçün istifadə oluna biləcəyi də bildirilir.

Yalnız 1 millimetr qalınlığında və 3,5 millimetr uzunluğunda yeni hazırlanmış simsiz kardiostimulyator şprisin ucuna sığacaq qədər kiçikdir.

Cihaz xəstənin sinəsinə yapışdırılmış yumşaq yamaq ilə birləşdirilir. Yamaq nizamsız ürək döyüntülərini aşkar etdikdə, kardiostimulyatora hansı ritmin stimullaşdırılması lazım olduğunu bildirmək üçün işıq siqnalları göndərir.

Cihaz bu günə qədər laboratoriya mühitində siçan, donuz, it və insan ürək toxumalarında uğurlu nəticələr göstərib.

Çikaqo Universitetindən Bozhi Tian araşdırmanı qiymətləndirərək, bu yeni kardiostimulyatorun tibbi texnologiyada bir inqilab olduğunu bildirib . “O, təkcə kardiologiya sahəsində deyil, sinirlərin bərpası, yaraların sağalması və ağıllı implantlar kimi bir çox sahədə yeni imkanlar təqdim edə bilər",- deyə o əlavə edib.

Qeyd edək ki, Ümumdünya Səhiyyə Təşkilatının (ÜST) məlumatına görə, ürək xəstəlikləri dünyada ən çox ölümə səbəb olan xəstəliklər sırasındadır.

Humay Eminqızı