ABŞ-də bəzi məhkumlar vaxtından əvvəl azadlığa buraxılacaq

ABŞ-nin Nyu-York ştatında yerləşən həbsxanalarda bəzi məhkumlar vaxtından əvvəl azadlığa buraxılacaq.

E-huquq.az xarici mətbuata istinadən xəbər verir ki, bu barədə İslah və İcma Nəzarəti İnstitutunun direktoru Daniel Martuscello məlumat verib.

Belə ki, martın 10-da Nyu Yorkda 2 mindən çox həbsxana işçisinin işdən çıxarılmasından sonra həbsxanalarda kadr çatışmazlığı problemi yaşanıb. Martuscello həbsxana müdirlərinə yüngül cinayətlərə görə mühakimə olunan və cəza müddəti 15 ilə 110 gün arasında qalan məhbusların vaxtından əvvəl azadlığa buraxılması barədə tapşırıq verib. Direktor cinsi zorakılıq, qətl, terror və digər ağır cinayətlərə görə mühakimə olunan məhkumların vaxtından əvvəl azad edilməyəcəyini vurğulayıb.

Qeyd edək ki, fevralın 17-də Nyu-Yorkda həbsxana işçiləri iş şəraitinə etiraz olaraq tətil edib. Buna görə xeyli sayda həbsxana işçisi işdən azad edilib.

Şəbnəm Mehdizadə