Bu ölkələrdə dabaq xəstəliyinə qarşı mübarizə tədbirləri gücləndirilib

Çexiya və Avstriyada dabaq xəstəliyinə qarşı mübarizə tədbirləri gücləndirilib.

E-huquq.az xəbər verir ki, Slovakiyanın Macarıstanla sərhədində aşkarlanan və sonradan hər iki ölkədə yayılan dabaq xəstəliyi xeyli sayda mal-qaranın tələf olmasına səbəb olub.

Avstriya Səhiyyə Nazirliyinin məlumatına görə, hər iki ölkədən diri heyvan, təzə ət və süd idxalı qadağan edilib. Sözügedən ölkə sərhədlərində xüsusilə nəqliyyat sahəsində nəzarət gücləndirilib, ciddi gigiyena qaydaları tətbiq edilib. Bundan əlavə, açıqlamada hər iki ölkənin sərhədində yerləşən təsərrüfatlarda və oxşar müəssisələrdə gigiyena tədbirlərinin gücləndirildiyi, mütəmadi olaraq sınaq və nəzarətlərin həyata keçirilməyə başlandığı bildirilib.

Çexiyada Avstriya, Slovakiya və Macarıstan sərhədlərində yük maşınlarının yoxlanılacağı və dezinfeksiya ediləcəyi bildirilib. Bundan əlavə, hər iki ölkənin sərhədində yerləşən təsərrüfatlarda və oxşar müəssisələrdə gigiyena tədbirləri gücləndiriib, mütəmadi olaraq sınaq və nəzarətlər həyata keçirilməyə başlanılıb.

Macarıstan milli mətbuatının məlumatına görə, dabaq xəstəliyi səbəbindən ölkədə 2700-ə yaxın iribuynuzlu heyvan məhv edilib. Epidemiya ilə bağlı Slovakiyada fövqəladə vəziyyət elan edilib. Lakin ölkədə kəsilən heyvanların sayı ilə bağlı hələlik heç bir açıqlama verilməyib.

Şəbnəm Mehdizadə