Quraqlıq və səhralaşmaya görə milyonlarla insan evlərindən didərgin düşüb

Hər il dünyada milyonlarla insan ekstremal hava hadisələri, quraqlıq və səhralaşmaya görə evlərini tərk etməli olur.

E-huquq.az xarici mətbuata istinadən xəbər verir ki, 2015-ci ildə imzalanan Paris İqlim Sazişi qlobal istiləşməni 1,5 dərəcə Selsi ilə məhdudlaşdırmağı hədəfləsə də 2024-cü ildə dünyanın orta temperaturu artıq Selsi üzrə 1,6 dərəcəyə çatıb.

Alimlər bu artımın əsrin sonunda 3,1 dərəcə Selsiyə çata biləcəyini proqnozlaşdırırlar.

Birləşmiş Millətlər Təşkilatının məlumatına görə, ölkələrin 95 faizi 2035-ci il üçün yeni iqlim hədəfləri təyin etmək üçün son tarixi qaçırıb. ABŞ Bayden dövründə BMT-nin çətiri altında Yaşıl İqlim Fonduna 1 milyard dollar yardım etsə də Tramp administrasiyası bu fond üçün götürdüyü 4 milyard dollarlıq öhdəlikdən geri çəkilib. ABŞ yardımının kəsilməsi bütün dünyada ekoloji layihələrə mənfi təsir göstərir.

2024-cü ildə Qərbi Afrika və Cənubi Asiyada daşqınlar minlərlə insanın ölümünə səbəb olub. Bütün dünyada 41 gün ərzində təhlükəli dərəcədə isti hava qeydə alınıb. Sudanda şagirdlərin şiddətli istilər səbəbindən huşunu itirməsi səbəbindən məktəblər iki həftə bağlanıb. Amazon hövzəsindəki şiddətli quraqlıq səbəbiylə bölgədə rekord səviyyədə ən aşağı su səviyyəsi qeydə alınıb. BMT-nin məlumatına görə, 2023-cü ildən bəri Afrikada 159 ekstremal hava hadisəsi baş verib və bu hadisələr 28 mindən çox insanın ölümü ilə nəticələnib.

2023-cü ildə 26,4 milyon insan təbii fəlakətlər səbəbindən evlərini tərk etmək məcburiyyətində qalıb. Bu rəqəm müharibə və zorakılıq nəticəsində didərgin düşmüş insanların sayından çoxdur. Təbii fəlakətlər səbəbindən miqrasiya edənlərin əksəriyyəti Afrikanın cənub-şərqində və Şərqi Asiya Sakit okean regionlarında cəmləşib. Ardıcıl quraqlıq və daşqınlar səbəbindən 2023-cü ildə Somalidə 2 milyondan çox insan didərgin düşüb. Bununla yanaşı Keniya və Efiopiyada 1,2 milyon insan miqrasiya etməli olub.

Şəbnəm Mehdizadə