ABŞ-da güclü qasırğa nəticəsində ölənlərin sayı 34-ə çatdı - FOTO - YENİLƏNDİ

ABŞ-ın cənub-şərq ştatlarında baş verən güclü qasırğalar nəticəsində ölənlərin sayı artmaqdadır.

E-huquq.az xəbər verir ki, bu barədə Missisipi qubernatoru Tate Reeves məlumat verib.

Missuri ştatında 12 nəfər həyatını itirib. Missisipi ştatında isə bir neçə qasırğa nəticəsində 6 nəfər ölüb. Kanzasda toz fırtınası səbəbindən 55-dən çox avtomobilin iştirakı ilə zəncirvari qəza baş verib və ən azı 8 nəfər həlak olub. PowerOutage izləmə sisteminə görə, Miçiqan, Missuri və İllinoys da daxil olmaqla yeddi ştatda 250 mindən çox ev və iş yeri elektriksiz qalıb.

Missuri qubernatoru Mayk Keho, ştatın "güclü fırtınalar və qasırğalar tərəfindən dağıdıldığını, evlərin yıxıldığını və can itkilərinin yaşandığını" bildirib. Missuri fövqəladə hallar idarəsinə görə, ilkin məlumatlar ştatda 25 bölgədə toplam 19 qasırğanın baş verdiyini göstərir. Həlak olan 12 nəfərdən birinin evi qasırğa tərəfindən tamamilə dağılıb.

Butler County məhkəmə eksperti Cim Akers, CBS News-a verdiyi müsahibədə, "Bura tanınmaz vəziyyətdə idi. Sadəcə bir xarabalıq idi" deyib. O, həmçinin əlavə edib: "Hamımızın qulaqları partlayacaq kimi idi." Rəsmilər, sakinləri hava şəraiti ilə bağlı xəbərdarlıqları diqqətlə izləməyə və təhlükəsizlik tədbirlərinə riayət etməyə çağırır.

***

ABŞ-ın Orta Qərb və cənub ştatlarında baş verən güclü fırtınalar nəticəsində həyatını itirənlərin sayı 33-ə çatıb.

E-huquq.az xəbər verir ki, bu barədə Amerikanın yerli mediası məlumat yayıb.

Fırtına Texas, Missuri, Oklahoma, Missisipi və Alabama ştatları da daxil olmaqla, ölkənin böyük bir hissəsini əhatə edib. Minlərlə insan evlərini itirib, ən azı 29 nəfər yaralanaraq xəstəxanaya yerləşdirilib. Rəsmi məlumatlara görə, Missuri ştatında 12, Missisipi-də 6, Kanzasda 8, Arkanzas və Texasda hər birində 3, Oklahomada isə 1 nəfər həyatını itirib.

Meteoroloqların proqnozlarına əsasən, güclü fırtınaların həftə sonu da davam edəcəyi, xüsusilə Missisipi və Alabama ştatlarında qasırğaların təsirli olacağı gözlənilir. Eyni zamanda, ani daşqınlar barədə də xəbərdarlıqlar edilib.

Fırtına nəticəsində çox sayda ev və infrastruktur zərər görüb. Fövqəladə hallar xidməti və yerli hakimiyyət orqanları xilasetmə və yardım tədbirlərini davam etdirir, zərərçəkənlərə sığınacaq və tibbi yardım təmin edilir.

Rəsmilər, vətəndaşları hava şəraiti ilə bağlı xəbərdarlıqları diqqətlə izləməyə, təhlükəsizlik tədbirlərinə riayət etməyə və zəruri olmadıqca evlərini tərk etməməyə çağırır.

Mənbə: APA