Moldovada prezident seçkiləri və referendumda səsvermə başa çatdı - YENİLƏNDİ

Moldovada Avropa İttifaqına üzvlüklə bağlı referendum və prezident seçkilərində səsvermə başa çatıb.

E-huquq.az Mərkəzi Seçki Komissiyasına (MSK) istinadən xəbər verir ki, seçki məntəqələri saat 21:00-da (Bakı vaxtı ilə 22:00) bağlanıb.

Bununla belə, bəzi Qərb ölkələrində səsvermə davam edəcək.

Seçkilər yüksək seçici fəallığı şəraitində keçib. Saat 21:00-a olan məlumata görə, seçici fəallığı 51,3% olub və səsvermənin etibarlı sayılması üçün 33,3%-lik həddi keçib. Bu vaxta qədər MSK və müşahidəçilər seçkinin nəticələrinə təsir edə biləcək hər hansı əhəmiyyətli pozuntu qeydə almayıblar.

***

17.30

Moldovada keçirilən prezident seçkilərinə və Aİ-yə üzvlüyə dair referenduma seçicilərin iştirakı səsvermənin və plebisitin tanınması üçün lazım olan 33,3 %-i keçib.

E-huquq.az xəbər verir ki, bunu Mərkəzi Seçki Komissiyasının saytında real vaxt rejimində məlumatları yeniləyən informasiya sisteminin ilkin məlumatları sübut edir.

Seçkilərdə 11 namizəd, o cümlədən parlamentin tam dəstəyinə sahib olan respublikanın hazırkı rəhbəri Maya Sandu prezidentliyə namizəddir. Onun əsas rəqibi Sandunu Rusiya ilə qarşıdurma siyasətinə görə tənqid edən keçmiş Baş prokuror Aleksandr Stoyanoqlodur. Seçkilərlə eyni vaxtda Aİ-yə inteqrasiyanın ölkənin strateji hədəfi elan edilməsi ilə bağlı referendum keçirilir.

Müşahidəçilər qeyd edirlər ki, plebisit iqtisadi böhran və müxalifətin etirazları fonunda Sandu ikinci müddətə yenidən seçilməsinə kömək etmək məqsədi daşıyır. Seçkilərin qalibi seçicilərin yarısından çoxunu toplayan namizəd olacaq. Əks təqdirdə, noyabrın 3-də ikinci tur keçiriləcək və birinci turun iki lideri iştirak edəcək.