Avropa İttifaqının ölkəmizdəki nümayəndəliyinə məxsus 980 min manatı mənimsəməkdə ittiham olunan Zərifə Abbasovanın məhkəmə araşdırması yekunlaşıb.

E-huquq.az-ın əldə etdiyi məlumata görə, Bakı Ağır Cinayətlər Məhkəməsində keçirilən iclasda hökm oxunub.

Hakim Əhməd Quliyevin sədrlik etdiyi məhkəmə tərkibinin qərarı ilə Z.Abbasovaya qiyabi olaraq 10 il 6 ay azadlıqdan məhrum edilib. Onun evi ziyanın ödənilməsinə yönıəndirilmək məqsədi ilə müsadirə edilib.

Xatırladaq ki, Zərifə Abbasova barəsində ibtidai istintaq dövründə ev dustaqlığı qətimkan tədbiri seçilmişdi. Məhkəmənin ilk iclasında da onun sərbəst mühakimə edilməsinə qərar verilmişdi.

Amma bir neçə iclas sonra xanım müttəhim məhkəmədən gizlənib. O, həbsli axrarışa verilib. Üstündən 7 ay keçməsinə baxmayaraq onun yerini müəyyən etmək mümkün olmayıb.

Bugünkü prosesdə prokuror Orxan Səmədov çıxış edərək məhkəmədən qiyabi qaydada ittiham edici hökm çıxarılmasını, üzərinə həbs qoyulmuş əmlakının müsadirə edilməsini istəyib.

Qeyd edək ki, Avropa İttifaqının Azərbaycandakı nümayəndəliyinin mühasibi vəzifəsində işləyən Zərifə Abbasova 2017-2022-ci illər ərzində Nümayəndəliyin bank hesabında olan pul vəsaitlərini nağdlaşdırmaqda, habelə saxta ödəniş tapşırıqları vasitəsilə müxtəlif vaxtlarda vəsaitləri öz əməkhaqqı kartına köçürərək təşkilata məxsus 980 min manatdan artıq pul məmimsəməkdə ittiham edilir. İstintaq materiallarında yazır ki, Z.Abbasova nümayəndəliyin rəhbəri Peter Mixalko və onun müavini Zoltan Szalainin ona qarşı inamından istifadə edərək vaxtaşırı onların səlahiyyətində olan möhürləri götürərək sənədlərə möhür vurub, onların yerinə imzalar atıb. Bundan sonra o, nümayəndəliyin hesabından şəxsi avro və manat hesablarına köçürmələr edib. Öz bank kartına köçürdüyü pulları əsasən, onlayn formada şəxsi ehtiyacları üçün xərcləyib.

Z. Abbasova məhkəmədə özünü qəsmən təqsirli bilib. O, 983 min deyil, 50 min manat mənimsədiyini etiraf edib.

Orxan Rasifoğlu